الاطباق المتحركه والثابته

[م.محمدالشحات]

أقدم لكم
اتكلم عن الاطباق المتحركه والثابته باستفاضه شويه .

عاوز تركب ثابت او متحرك ليه؟





تعالوا نحسبها مع بعض مش فلوس وبس .....

عاوز تركب ثابت ليه؟
=فلوسي علي قدي .
=مكاني ضيق .
=مفيش لي مكان في رووف العماره .
=اجرب حاجه جديده.
//////////////////////////////////
هتركب كام عدسه؟
=تركيبه شيرنج 4 عدسات بالكتير
=هركب 8 عدسات لاستغلال دايزك 8 مخارج.
///////////////////////////////////
التكلفه كام ؟
عدسات مثلا زي النوفا الواحده ب 70 ج
طبق متر 350 الي 400 ج
سلك المتر من 5 الي 10 ج
دايزك 8مخرج ب 160
ظلط واسمنت وجبس،ورمل 50ج
اجره فني تركيب العدسه من 30 الي 50 ج حسب المكان .
/////////////////////////////////
النتيجه :
تركيبه شيرنج تلبي احتياجاتي لكن لا تدخلني في منطقه مقارنه الاشارات لا مع طبق ثابت اخر ولا متحرك.
وهنا يحصل الخلاف المدمر مع الفني واتهامات متبادله بين الطرفين .

لكن انصح بالاتي :
قبل ماتفكر تركب ثابت او متحرك اسال علي الاتي:
1-مميزات وعيوب الثابت والمتحرك وايهما يناسب ويلبي احتياجاتي.
2-اشتري بضاعتك بنفسك ان كنت لا تثق في حد وبني ءادم شكاك.
3-اسال علي الفنيين الكويسين
4-اتفق ثم اتفق ثم اتفق مع الفني قبل ما ييجي لك .
5-استلم منه اشارات قبل لما يمشي واستلم اساراتك تحت مش جنب التركيبه .

6-ماتركبش اكتر من 4 عدسات ثابت علي طبق واحد والا هتفقد كتير من الترددات .
7-ماتشوفش فني جايب تردد سوبر علي طبق ثابت وتطلب من فني اخر يجيبهولك لان في عوامل كتيره ممكن تلعب دور ان التردد ده بعينه مايجيش عندك زي التغطيه والشوشره من ابراج محمول ومهاره فني ونوع عدسه وموانع اشاره والخ ....الخ

طيب لو انت ماعندكش موانع تركب متحرك ومركبتوش يبقي تستاهل اللي يجري لك لان المتحرك متعه ودنيا تانيه خالص.

رينج اسعار الطبق المتحرك المحلي (طبق ووحده وماتور )كالاتي
120 سم من 600 الي 700 ج
160سم من 700 الي 800 ج
180سم من 800 الي 1200ج
وفي ناس بتبيع ب 1500 ج

240سم من 1600 الي 2000ج
والاسعار دي تقريبيه ومتدرجه حسب نوع الطبق والوحده والماتور والحاله العامه ولازم الطبق يكون كامل بدراعاته والبولار والاستاند وغير مشتمل علي الفلانشه او العدسه الا لو كان زبون معرفه او زبون دائم .

فنيين المتحرك كتير وكلهم ماشاء الله ثقه واساتذه .
الطبق العميق زي المسطح في الاشاره بل يفوقه شاء من شاء وابي من ابي ومش هجادل في دي لكن الفني بيحب يشتغل في المسطح لانه بيرد الاشاره بسرعه ومش متعب والزبون مش بيحب العميق لانه بيحتاج صبر وفن في الظبط وفيد وهو مش عاوز التكلفه تزيد .
لو انت مدلع وهتركب امريكي أسعاره كالاتي
باراكليبس من ٣٦٠٠ الي ٤٥٠٠ ج
اندرسون فوق ٦٠٠٠ الي ٧٥٠٠ ج واحيانا ٨٠٠٠ج
دي اتش من ٥٥٠٠ الي ٦٥٠٠ ج.
الفيمافال البرتغالي من ١٠٠٠٠ الي ١٣٠٠٠ ج .
هتركب ٢٤٠ محلي أو امريكي يبقي لازم عدسه من ٢
انفرتوا أو ستار جولد فوجي
ماتور ٣٦ وتمنه من ٨٠٠ الي ١٤٠٠ ج حسب الحاله .
.اختار فني المتحرك بعنايه .مش اي فني وفي اساتذه معروفين بالاسم وشغلهم نار .
ضبط الطبق الأمريكي لو ربنا مسهل ياخد من ٦ الي ٨ ساعات
.
اوعي تستخسر اجره فني المتحرك ابدا .دي ناس تتاقل بالذهب وهتشوف إشارات خيال .
دراعات الأطراف مهمه جدا بتوسع زاويه رؤيه حواف الطبق ولو أن في ناس بتقول ما بتفرق لكن أنا شخصيا بشوفها مهمه .
لو ركبت متحرك بعد التركيب حط علي كل مسمار حته شحم وليس زيت .
صيانه ماتور المتحرك
الدراع يتزيت والتروس تتشحم وياسلام لو شحم حراري بتاع الطيارات .

لو تاني مفيش،موانع للمتحرك ركبه ومش هتندم ابدا .

[السيد الوحش]

تسلم ياهندسه طرح طيب هو ليه عاموس العدسه واخده اتجاه معاكس اعتقد كده هتعكس الترددات الh مكان v
وتسلم ايديك موضوع شامل

[الباشا وليد]

تسلم ايديك يا غالى على هذا الطرح
تحياتى لك يا هندسة

[م.محمدالشحات]

المشاركة الأصلية كتبت بواسطة السيد الوحش

تسلم ياهندسه طرح طيب هو ليه عاموس العدسه واخده اتجاه معاكس اعتقد كده هتعكس الترددات الh مكان v
وتسلم ايديك موضوع شامل

هى صورة للشرح

فقط ياهندسة ماخوذة من صديق

[مركز مريم]

بارك الله فيك اخي الغالي

جزاك الله خيرا

[@أشرف عباده@]

تَسَلُّمُ يَاغَالِىْ بَارَكَ اَللَّهُ فِيكَ

[waleed1977]

موضوع مفيد جدا